FANDOM


Kuentikos de la Tia de SuluchaEdit

La tia de Sulucha vino de Estambol para vijitar a su sovrina en Inglaterra.

-Tia, kualo keres komer esta noche? Keres pishkado? Keres dondurma?

-Hanuma, oy no paso ni el balukchi ni el dondurmadji, komo me vas a dar a komer todo esto?

-No te merekiyes, en kaza ya tenemos todo en la buzana.

-Komo puede ser? Parese ke el mundo troko en los dalkavo 50 anyos. Yo no esto entendiendo komo kitaj la komida yelada buz, la metej en el orno de mikro-ondas, i pishin en dos puntos la komida esta pronta. Esto no me esta kuadrando.

-Ya parese ke entrates en edad

-Ken disho? Ya tengo kaji 90 anyos, ama me siento dayinda mansevika.

-Ke bivas fina los 120!


La tia de Sulucha i las vakas lokas

- Sulucha, la komida ke izites tiene un golor muy bueno. Kualo es? Es karne de vaka?

- No, tia, aki no mos atrivimos a komer karne de vaka. Algunas vakas inglezas se izieron lokas, i la hazinura puede pasar a las personas.

-I kualo vamos a komer?

-Karne de domuz

-Domuz?(1) El dyo ke mos pedrone los pekados.

-Tia, no te merekiyez, yo ya avli kon los mijores de mozotros. Me disheron ke en kavzos asemejantes, ya se puede komer trefa.

(1) domuz = puerko


La tia de Sulucha i los ladrones inglezos

-Sulucha, estos chadires ke trushe de Estambol, los va meter en un lugar siguro. No kero ke se los roven los ladrones. Ya saves ke eran los chadires de tu nono. Agora, ni si das milyones no topas los mizmos.

-Tia, aki los ladrones inglezos no rovan chadires. Rovan computers i televizyones.

-Esto kere dizir ke no se deranjan para un chadir. Ya esta moy ermozo. Ke semojen debasho de la luvya, i ke no token a mis chadires.


La tia de Sulucha salio a tomar aver

-Tia, oy salio sol, te kero yevar al park para tomar aver.

-Bueno, me vistere i me atakanare, i salimos a kaminar.

-No tenemos acele, ki keres, kaminamos avagar avagar i miramos las kazas i las uertas ke ay en el kamino.

-Si, ya me esta plaziendo este vizindado. kada kazika tiene su uerta.

-Los inglezes son muy meraklis de uertas.

-Mira, esta huerta tiene una pared muy alta. Deve ser la kaza de un muzulmano.

-Deke dizes ansina?

-Metio pared alta para ke los vizinos no le veyan la mujer.

-Esta uerta tiene la pared bashika.

-Esta deve ser kaza de un grego: kere ke los ladrones vengan a arovar a su mujer para fuirse kon otra.

-Mira, esta huerta no tiene pared del todo.

-Esta es kaza de Inglez: kere amostrar su mujer al mundo entero.


La tia de Sulucha i las otomobiles


- Sulucha, parese ke en este payis, merkar otomobil es komo merkar kalsados en Estambol.

- Tia, deke dizes ansina?

-Mira, ijika, en Estambol todo el mundo kamina en las kayes. En Ingilterra las kayes estan vaziyas, i kada uno esta en su otomobil.

- Ya tienes razon.

-Mira este vizino tuyo: kito sus kozas de una otomobil i las metio en otra otomobil.

- Si, ya esta justo.

-Esto kere dizir ke kada persona tiene dos otomobiles. En Estambol tenemos dos kalsados, uno para kada pie, i aki tenej dos otomobiles, una para kada pie!


La tia de Sulucha i los haberes de Estambol.

-Sulucha, esta televizyon por satelit ke tenej aki es koza grande. Ya me paso muy makpul.Ayde, mete los haberes de TRT para ver lo ke esta afitando en el mundo.

-Uvo inondasyones en Mozambik. La guerra en Chechniya esta kontinuando. En Kosovo se estan muriendo de frio i de ambre. El presyo del simit suvyo.

-Atyo, no me digas! Kuando vine de Estambol el simit kostava 100,000 liras. I agora kuanto es?

-Ya suvyo a 150,000.

-Este es el haber mas negro del dia. Kuando yo era chikitika, un simit era vente paras.

-I kuanto valia una para?

-Te eksplikare, hanuma. Tu dayinda sos manseva i no saves estas kozas. Kuarenta paras era un grosh, i sien groshes eran una lira. Oy en dia se kere kaji un milyon de liras para merkar una Sterlina.

-Esto se yama enflasyon.

-El Dio ke se les venge de los ke trusheron la enflasyon i suvyeron el presyo del simit!


La tia de Sulucha topo ofisyo

-Sulucha, tengo haberes buenos para ti. Ya topi ofisyo, i de agora adelantre va lavorar.

-Tia, a tu edad se lavora? Ya vaz a tener 90 anyos!

-Deke no? Tu marido i tu estaj lazrando i penando todo el dia. Parese ke los Inglezes biven para lavorar. En Estambol es todo a la roves: lavoramos para bivir.Agora yo me va azer Ingleza.

-Komo keres tu, tia. Ke ofisyo topates?

-Mira te dizere hanuma: aki los turistos pagan paras para ver kozas viejas. Mas vieja de mi, no van a topar. Ya se dize ke yo so una antika. Kada dia me va ir al musee, i me va asentar aya para ke la jente venga a verme. I si keren avlar kon mi, la lingua ke avlo yo tiene mas de 500 anyos. Ke dizes de mi idea para ganar paras?

-Ya esta maraviya!



From: renee <renee@...>
Date: Mon Feb 21, 2000 9:01 pm
Subject: Repuesta de Sulucha renee@...

Para Matilda Koen Sarano:

Keres saver ande nasi, ande bivo i kuantas linguas avlo. Parese la enkizisyon espanyola!

Nasi en Estambol i bivo en el Payis de Gales (Gran Bretanya). Avlo Turko, Ingles, Italiano, Franses, Judio (la lingua muestra) i Espanyol moderno.

La tia de Sulucha avla solo Judio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.

Matilda, tu i yo mos konosimos en Londra kuando vinites kon tu marido a la konferensiya de Judeo-Espanyol organizada en el Queen Mary & Westfield College. Tu no te akodras de mi, ama yo me akodro muy bueno de ti. Mos kontastes estoryikas de Djoha fina la media noche, de akeyas estoryikas ke no se pueden kontar entre el dia. Mos pishimos todos de la riza.

Para todos:

Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.

Lo ke yo kero saver es de ande viene este nombre. No me lo disheron nunka. Si alguno de vozotros lo save, voz rogo ke me lo digaj.

Renee

http://groups.yahoo.com/group/Ladinokomunita/message/87

Ad blocker interference detected!


Wikia is a free-to-use site that makes money from advertising. We have a modified experience for viewers using ad blockers

Wikia is not accessible if you’ve made further modifications. Remove the custom ad blocker rule(s) and the page will load as expected.